[2007 台北．美食] Day 2 烏來、深坑豆腐街

~Day 2~

30/6/2007 (Saturday) 晴

台北 --> 烏來 --> 深坑豆腐街 --> 台北 101 --> 台北

10:00 am	今日十點鐘起身, 執好行理 check out。然後搭的士去今晚會入住既 "萬事達旅店", 黎呢 d 地方旅行就有咁既好處, 消費平, 嫌麻煩就搭的士, 幾方便。 唔知係咪呢幾日好多香港人黎旅行呢？好多香港人熟悉既酒店, 好似天成, 東龍, 長虹等都 book 唔倒, 於是我就自已上網 book 左呢間都係係西門既 "萬事達旅店" 喇。呢間酒店係新開的, 暫時好似冇咩香港人識咁, 都唔錯, 房入面有 LCD 大電視, 雪櫃仲有汽水同小食送俾你, 唔收錢。不過我諗可能呢間野新開想吸引多 d 人黎, 口啤好緊要的, 遲 d 多人識黎佢唔知仲會唔會送免費汽水呢？ 講左咁多, 其實咁早都未入得房, 我地只係可以叫酒店幫我地 keep 住 d 行理咋。
11:05 am	放低 d 行理, 就到隔離既 Mos Burger 食早餐先, 幾好食。
11:45 am	食完野發覺時間不早了, 於是趕去搭捷運。我地首先要到烏來, 頗遠的。先要搭捷運到中正紀念堂站, 再轉線到捷運新店站, 然後再係新店站轉搭公車。
12:20 pm	去到新店, 見到有好多人係度等公車到烏來。公車站隔離就有好多的士司機係度搵生意, 說到烏來每人只需 NT$100。搭公車每人 NT$40, 我地原先都冇打算搭的士。不過等呀等, 等左好耐都未有車, 加上時間又唔早, 所以我地就叫埋前面果對男女一齊搭的士喇, 佢地都 ok 話一齊搭。架的士唔知係咪想做多幾程生意, 開得好快, 12:45 pm 就來到烏來了。
12:45 pm	黎到烏來, 梗係要去欣賞烏來既瀑布啦。呢度原本有一架小火車係俾 d 遊客坐住黎欣賞瀑布架, 不過好可惜, 咁岩撞正佢維修冇得坐。於是就要辛苦 d 咁行入去睇洛。沿住瀑布路行, 好好天, 不過好熱, 聽聞香港仍然係落緊大雨啊！行到去瀑布區, 見到有幾個香港人, 大家仲幫對方影相 tim。欣賞完瀑布就沿路走返出烏來老街喇。
2:20 pm	烏來老街有好多食肆同商舖, 呢度出名既美食就係 "菜" 喇, 我地去左旅遊書介紹既 "泰雅婆婆美食店" 食 lunch。我地叫左一碟 "空心菜", 似係香港既通菜, 超好味呀, 我地食完呢碟菜, 之後番到香港出街食飯, 每次都要叫番碟通菜食。另外叫左一碟炸雞, 一個竹筒飯, 都係好好食, 旅遊書真係冇介紹錯。
3:30 pm	食完野就搭公車去另一個好遠既地方 --- 深坑喇。我地先搭公車到捷運新店站, 再搭捷運到景美站, 最後要再轉 666 號公車到深坑。
5:30 pm	我地係深坑老街落車, 一落車已經見到好多人係度排隊買臭豆腐食。呢度成條街都係賣豆腐既, 所以亦叫 "深坑豆腐街"。我好鍾意食臭豆腐, 所以我又買黎試下, 佢 d 臭豆腐同香港果 d 好唔同, 入面有好多菜, d 醬汁亦都唔同, 我就鍾意食香港果 d 多 d。 深坑老街兩邊間間舖頭都係賣豆腐既, 好有特色, 不過我諗係多人熱鬧啦, 如果條街冇乜人冷清清咁可能會覺得冇咩野睇。經過一間叫 "兜福工場" 既舖頭, 係賣豆腐味雪糕既, 好多人買黎食。之前係香港都試過豆腐味雪糕, 覺得唔好食, 可能佢整得難食啦, 黎到呢度諗住試下啦, 點知又幾好味喎, 呢度不愧係賣豆腐既地方呀！
6:00 pm	行完街, 最後選左 "六嬸婆" 餐廳來品嚐一下呢度 d 地道豆腐菜。好彩我地都好鍾意食豆腐, 如果唔係都冇乜好食, 哈哈。
	食完野經過老街走回巴士站, 準備搭車到市政府。
7:10 pm	就係呢個時候, 發生左一件好令人憤怒既事。因為我地下一個目的地係台北既 101 大樓, 呢度有一架公車係去市政府的, 睇下個公車站時間表, 要七點半先有車, 都要等好耐, 但我地諗住唔駛轉車, 方便 d, 於是就照等啦。等左好耐, 終於有車黎喇, 隔離有班人見有車黎到, 突然飛撲出黎, 塞住左個上車既門口, 佢地問左司機一 d 野, 應該係問下呢架車岩唔岩, 去唔去到佢地要去既地方之類既問題, 問完之後, 佢地似乎唔係要搭呢架車, 於是就退後唔上車, 咁我地就上車啦, 點知係呢個時候, 個司機居然關上車門, 仲以九秒九極速既時間開車走左, 我地呆晒, 唔知做咩好......係呢一刻, 真係無言, 等左咁耐先有車, 居然俾呢班人搞到上唔倒車, O 晒咀...... 唉, 當黑, 下一班去市政府既車要等好耐, 咁我地就只好搭番 666 號公車出捷運木柵站, 然後再轉捷運到復興站喇。
8:20 pm	係捷運復興站有免費接駁公車到台北 101 大樓, 我地好快就到左喇。去到先行下個大商場, 最後先上展望塔。
9:00 pm	九點鐘買飛上展望塔, 每人 NT$350, 都不便宜呀。去到有好多人排緊隊, 準備搭那部堪稱世界最快速電梯上去最頂的觀賞台, 當中有好多係日本人啊！部電梯又係幾快喎, 唔記得過左幾多秒就上到去頂層了。
10:30 pm	搭接駁公車返回復興站, 再搭捷運回西門。因為太早食晚飯 (其實只是豆腐餐), 所以大家都有點餓, 於是就近近地走去食番碗阿宗麵線喇。點解食極都咁好味架？
11:30 pm	番到萬事達旅店, 取回行理上房了。