[2007 台北．美食] Day 1 西門町掃街

~Day 1~

29/6/2007 (Friday) 晴

香港 --> 台北桃園中正機場 --> 西門町 --> 台北

1:15 pm	今日番半晝, 十二點半就可以放工喇。呢幾日香港都不停咁落雨, 仲要係好大果隻。我預約左架的士入機場, 沿途都係落大雨, 大到連條路都睇唔清楚, 直至去到東涌, d 雨先停落黎。
2:00 pm	大概兩點鐘去到機場, 先到中華旅行社既 counter 取台証, 都等左差唔多二十分鐘。見應該冇時間食野, 於是買左個飽食住先。取台証後, 已經兩點幾, 於是飛奔去華航既 counter check in, 嘩, 好鬼多人, 打晒蛇餅...... check in 完都差唔多要入閘了, 因為登機閘口都幾遠, 要搭接駁車的。
3:35 pm	飛機遲左少少起飛, 不過唔緊要, 華航 d 空姐超有禮貌, d service 好好。都話國泰 d service 差, 都唔明點解 d 人咁鐘意搭國泰, d 空姐串到死。 不過華航又真係成日有意外, 係衰 d 既。
5:15 pm	飛機到達台北後, 獨自一人辦理入境手續, 因為冇行理寄倉, 所以好快就離開禁區了。 出到接機大堂, 先去換台幣, 需要 20 元手續費。跟住就去買國光巴士既飛出台北車站了, 費用 NT$125。
6:00 pm	國光巴士大概六點鐘出發, 原本預計 45 分鐘已可出台北車站, 怎知中途大塞車。呢個時候拎個電話出黎諗住通知阿明啦, 點知......收唔倒既......大鑊...... 岩岩轉左 3 g 台, 以前唔駛申請就自動有漫遊服務架嘛, 3 點做生意架？通知唔倒佢, 心諗佢會唔會等我架？......差唔多七點半, 終於到達台北火車站, 落車後, 見倒阿明已經企左係度等我了, 放下心頭大石。
8:30 pm	番酒店放低 d 行理, 休息一陣, 就準備出西門町掃街喇。落到捷運站, 我先去買左一張悠遊卡, NT$500, 一張好似八達通既卡, 遊客又可以買, 用完又可以隨時退番錢, 真係 good 呀。買完卡就可以搭捷運去西門喇。
	因為好肚餓既原故, 我地即刻飛奔去食超正既 "阿宗麵線"。冇黎兩年, 呢度仍然係咁多人, 冇計啦, 阿宗麵線真係好鬼好食呀。點好食法？唔識形容, 總之係好好食啦。我地叫左一碗大既, 免得食得太飽, 食唔倒其他野。食阿宗麵線, 記住落佢地 d 辣椒油, 好好味。
	食完麵繼續行, 西門町好似旺角, 好熱鬧。我地一路行, 見到街頭好多小食, 我地買左一條 "糯米腸" 食, 一條好似腸但係入面有好多飯咁既野。 買完之後發覺呢 d 都係冇牌小販, 係呢個時候好似有人黎捉佢地, 佢地就推住架車係咁走, 其實都幾危險。 我地走遍西門町既每一個角落, 見倒好多旅遊書都有介紹既舖頭, 我地再買左一塊雞排食, 都差唔多飽了, 其他唔食既都影番 d 相啦。 最後我地去左誠品書店, 呢間唔係開 24 小時的, 我係度睇旅遊書, 因為七月既日本之旅我仲未準備好, 哈哈！睇到人地都要關門了, 我地就搭捷運番回台北車站。
11:00 pm	雖然只係行左一晚, 但都已經好累, 沖完涼好快就休息了。