[2007 台北．美食] Day 3 陽明山、公館嘆麻辣火鍋

~Day 3~

1/7/2007 (Sunday) 晴

台北 --> 孔廟 --> 忠烈祠 --> 士林官邸 --> 陽明山 --> 大忠館 --> 陽明書屋 (中興賓館) --> 天母 --> 公館 --> 台北

9:00 am	今日一早起身, 因為酒店包埋早餐, 雖然呢度既早餐比不上大酒店, 但味道都 ok 啦。
10:30 am	我地首先會去參觀孔廟, 由西門搭捷運去圓山, 出站後行十分鐘就到喇。 孔廟係紀念孔夫子的, 去到有好多似係日本黎既旅行團。
11:30 am	參觀完孔廟, 我地就搭的士去忠烈祠。忠烈祠離孔廟唔係好遠, 呢度搭的士又平, 所以都費事等公車了。 台灣既的士司機大多好好人, 一聽你講野就知你唔係台灣人。難聽 d 講, 即係香港人 d 國語唔掂囉, 不過佢地又話唔係, 佢地話係 d 口音唔同姐。知你香港黎, 佢地又會介紹好多台灣既地方俾你, 叫你去淡水呀, 野柳呀, 九份呀咁, 我地話呢 d 地方都已經去過了, 個司機就話, 咁都差唔多喇, 你地下次可以去下台中同台南玩, 其實我都好想去花蓮同墾丁架。 去到忠烈祠, 梗係要睇埋個換班儀式啦, 睇見 d 軍人係咁熱既天氣底下, 唔郁得咁企係度曬, 會唔會中暑架？
12:30 pm	離開忠烈祠既時候, 正值中午, 好鬼熱, 我地又搭的士去士林官邸, 唔駛十分鐘就到喇。我地原先以為可以入屋參觀, 但原來只係可以參觀個花園, 同埋宋美齡以前架車。
1:25 pm	一口氣參觀完孔廟、忠烈祠同士林官邸, 雖然對政治既野唔係太熟悉, 但都可以話俾人聽去過台灣了。另外仲有一定要去既國父紀念館同中正紀念堂我地兩年前已經去過了。之後我地就搭皇家客運上陽明山, 參觀陽明書屋。
1:45 pm	搭皇家客運係書屋站落車, 之後還要行多十分鐘才可到陽明書屋的。我地沿住車路一路行, 一路欣賞陽明山既景色。經過一間叫 "大忠館" 既台灣文化博物館, 見係免費入場, 咁就入去睇下啦。
2:45 pm	之後走到去陽明書屋喇, "陽明書屋" 原名 "中興賓館", 興建於民國 58 年至 59 年間, 昔為先總統　 蔣公接待國內外貴賓及夏日避暑之處, 現已成為陽明山國家公園重要人文史蹟建築物之一。蔣公逝世後, 於民國 68 年中國國民黨中央黨史委員會遷此辦公並將草屯、青潭的史料, 連同大溪資料室、芝山書屋「總裁史料」, 全部集中此地。自此, 中興賓館改稱為「陽明書屋」。 想知多 d 關於陽明書屋既野, 可以 join 佢地既專人導覽解說, 每人 NT$50, 需時約一個鐘。呢個服務有時間場次限制, 好好彩, 我地去到既時候, 岩岩有一班開始左, 佢仲比我地入去。講解既老師講得好詳細, 可惜我地既國語有限, 只聽倒五成。 從中興賓館望出去, 風景好靚, 好似置身半山區一樣, 不過可能會有好多蚊。
4:00 pm	個 tour 完左之後, 我地就等車去下一站 --- 天母了。陽明山風景係靚, 不過呢度既交通就認真麻麻, 我地等左好耐先有車出番去士林站, 然後再轉搭 285 號公車到天母區。
5:15 pm	天母係一個高尚住宅區, 令人有一種好舒服既感覺。黎到天母區, 突然醒覺原來今日仲未食 lunch, 唔怪得咁肚餓啦, 於是就去 kfc 醫一醫肚先。我地兩人只叫左一個餐, 唔敢食太飽, 因為我地今晚仲要去食一早 book 左位既麻辣火鍋呀。
	食完野就周圍行, 自遊行就有呢個好處, 唔駛淨係去 d 大路既地方, 其實人地既國家真係有好多值得一去既地方既。
7:00 pm	行到七點鐘, 就係新光三越搭免費接駁巴士到捷運芝山站, 然後再搭捷運到公館。到站既時候, 發覺好多人係呢個站落車, 出到站, 咦, 乜咁多人既, 原來公館都好旺, 有 d 似旺角喎。
8:00 pm	我地好快就搵到呢間 "馬辣鴛鴦火鍋專賣" 餐廳喇, 呢度唔見有香港人黎食, 因為旅遊書冇介紹過, 所以應該冇乜香港人識黎, 我都係一個係台灣做野既 fd 介紹我黎架, 佢仲幫我 book 埋位 tim。 呢度真係好正呀, 首先夠平, 每人只需 NT$399 另加一服務費, 計落都係大約一百蚊港紙。仲要係任食, 有蝦, 有蜆, 有靚肥牛, 仲有汽水任飲, Haagen-Dazs 雪糕任食 tim。唔好以為平就一定唔好, 佢 d 料好新鮮架, d 野食好味, 全部任食, 但 d 靚野好似肥牛咁, 就要落 order 等佢拎黎, 但你食完可以再叫。我仲飲左三支可樂同食左兩杯雪糕 tim。香港打個邊爐閒閒地都要百幾二百蚊, d 料靚 d 既都未必得, 仲要冇野飲 tim。
11:00 pm	食飽飽後就搭捷運番西門, 執野準備聽日番香港了。