2012 北歐．倫敦、芬蘭、斯德哥爾摩、塔林十天遊 - 行程規劃

~北歐．倫敦、芬蘭、斯德哥爾摩、塔林十天遊~

日期: 22/1/2012 - 31/1/2012

農曆新年又黎喇，今年決定去北歐既芬蘭，嘩哈哈！

其實今次呢個 trip 都有 d 即興架，以往去旅行好多時係一早諗左想去邊，但今次就冇。臨到新年前大約一個月，我話想去旅行，咁農曆新年去旅行不嬲都係超貴架嘛，睇黎睇去好似得歐洲相對抵去，因為天氣凍歐洲係淡季。不過亦都因為係淡季，去歐洲又好似唔係好岩季節咁喎，再上網睇下 d 人去邊啦，有人話去芬蘭睇北極光，我地就好似俾人 "叮" 醒左咁，呢個時候去芬蘭岩晒喎，一於去芬蘭。即刻 plan 行程同 book 野，又酒店又船又火車咁，我都覺得自已越黎越勁，定係越黎越求其？ >.< 不過客觀 d 講，plan 去歐洲係易過日本好多，淨係去東京大阪等大城市另計。

講番呢個芬蘭 trip，雖然天氣係凍 d (實際上唔係凍 d，係好好好凍先岩)，但呢個 trip 真係好精彩。

我地除左去到芬蘭北部既拉普蘭 (Lapland) 地區睇北極光、坐左全球唯一觀光破冰船三寶號 (Sampo)，仲去左聖誕老人村 (Santa Claus Village) 探聖誕老人同坐鹿車 (Reindeer Safaris) tim。除左芬蘭，我地亦有順道遊覽埋瑞典首都斯德哥爾摩 (stockholm) 同愛沙尼亞首都塔林 (Tallinn)。斯德哥爾摩有北方威尼斯之稱，亦有說是北歐最美麗既城市，我地只係短短逗留左兩日一夜，希望將來有機會可以再去慢慢欣賞呢個咁靚既城市。

今次係我地第一次踏足北歐既土地，俾我一個好好既印象。北歐治安好好，人民教育程度高，大都能講英語，仲肯熱心幫人。話說我地夜晚成九點鐘凍冰冰咁拖住行理去到赫爾辛基預先 book 左既 hostel，點知去到話冇我地紀錄又話已經冇晒房 >.< 我地當堂唔知點好，好彩最後有個芬蘭人幫我地，詳情容後再講。

總括黎講，呢個 trip 真係好精彩，快 d click 入去睇下啦！

在較大的地圖上查看北歐芬蘭極光之旅10天

事前準備

準備	備註
申請歐洲旅遊簽証	英國、芬蘭、瑞典以及愛沙尼亞都是免簽証
購買機票	用亞洲萬里通免費換取香港至斯德哥爾摩, 赫爾辛基至香港來回機票兩張, 另外換取赫爾辛基至羅凡尼米, 伊瓦洛至赫爾辛基來回內陸機票兩張
購買旅遊保險	於保誠購買旅遊保險
訂民宿, 酒店	於網上預約 (部分需先付款)
訂火車、郵船	於網上預約並付款
預約 Sampo 破冰船	於網上預約並付款
換歐羅	於 Citibank 花旗銀行換購

行程表

		住宿
Day 1	香港 --> 倫敦希斯路機場	航機上
Day 2	倫敦希斯路機場 -> 倫敦(London) --> 倫敦希斯路機場 --> 瑞典阿蘭達機場 --> 斯德哥爾摩 (Stockholm)	2kronor Hotel City
Day 3	斯德哥爾摩 --> 土庫 (Turku)	Viking Line 維京號郵船
Day 4	土庫 --> 赫爾辛基萬塔機場 --> 羅凡尼米 (Rovaniemi)	B&B Kotitie 小木屋
Day 5	羅凡尼米 --> 凱米 (Kemi) --> Sampo 破冰船 --> 羅凡尼米	B&B Kotitie 小木屋
Day 6	羅凡尼米 --> 聖誕老人村(Santa Claus Village) --> 薩利色爾卡 (Saariselka)	Hotel Kakslauttanen 小木屋
Day 7	薩利色爾卡 --> 拉普蘭伊瓦洛機場 --> 赫爾辛基萬塔機場 --> 赫爾辛基 (Helsinki)	Holiday Inn Helsinki City Centre
Day 8	赫爾辛基 --> 塔林 (Tallinn) --> 赫爾辛基	Holiday Inn Helsinki City Centre
Day 9	赫爾辛基 --> 赫爾辛基萬塔機場 -> 倫敦希斯路機場	航機上
Day 10	倫敦希斯路機場 --> 香港

整個旅程所需費用 (二人計)

現時日元高企, 十元港幣對換一百元日元, 但歐羅就相對平, 十元港幣對換一元歐羅, 係近年既新低...

機票、酒店、交通	約 $24000
食	約 $1500
手信	約 $600
娛樂	約 $5500
其他	約 $550
總計	約 $32150 (每人約 $16000)

如果想知我地每日去左邊就要逐日睇喇. 仲有相睇 tim.