[2011 上海、蘇杭] Day 1 上海

~Day 1~

24/12/2011 (Saturday) 香港 --- 晴，上海 --- 晴

香港 --> 上海浦東國際機場 --> 人民廣場 --> 南京路步行街 --> 外灘 --> 浦東

6:30 am	天都未光就出發, 6:30 am 到達機場。因提早一天係網上做左 check in, 所以只是去寄行理就可以了。網上 check in 時, 俾人 upgrade 左去坐 business class, yeah！
	寄左行理即刻過關, 跟住去左 Travel Lounge 食野...
8:00 am	港龍航空 KA 802 航班準時起飛, 機程兩個幾鐘......
10:20 am	到左上海浦東國際機場喇, 呢個機場好大, 好似香港果個咁。我地過左關就去買一卡通, 即係香港既八達通, 搭巴士或地鐵一 "嘟" 就得, 好方便。
11:50 am	買完一卡通去搭機場巴士五號線到上海火車站...... 雖然呢度有個電子時間表, 但都唔好期望好似日本果 d 咁準, 做個參考好喇......
1:00 pm	到左上海火車站, 我地未落車已經見到自已將會入住既酒店喇。雖然呢度唔係外灘浦東旅遊區, 但近上海火車站, 對於要去杭州蘇州既我地, 真係不二之選。
1:15 pm	check in 後上房放低行理, 然後執拾行裝出發。
2:15 pm	先到上海火車站買定明天去杭州, 後天去蘇州既火車票先。買飛既人好多, 但都好有秩序, 好快就搞掂左。
2:30 pm	買完火車飛就正式出發, 搭地鐵去人民廣場站, 目的地係港人必到既小楊生煎館同佳家湯包。一到步, 我就去佳家湯包排隊, 阿明去對面買小楊生煎包。小楊生煎包有好多肉汁, 冬天食一流。排後面班香港人食到成地都係, 講野又大聲, 煩到死...... 食完個生煎包, 佳家湯包都有位喇, 但係得番蟹粉鮮肉小籠包同純蟹粉小籠包賣咋...我地叫左一籠蟹粉鮮肉小籠包, 好好味, 皮薄多汁又好有蟹味既湯包, 推薦！
3:35 pm	食飽飽後就到人民廣場, 再到南京步行街。南京步行街就像旺角, 好多人。
4:35 pm	沿住南京步行街向東面一路走就可到外灘一帶......見到和平飯店, 入去參觀下......
	和平飯店再行出一點就是著名既上海外灘了, 望過對面就係陸家嘴, 可以清楚睇到上海地標 "東方明珠塔"。
6:00 pm	影到天都黑埋, 係時候食飯喇。我地係香港已經 book 左係外灘附近既 "上海姥姥", 試一試地道本幫菜先。我地點左出名既上海姥姥紅燒肉, 真係幾好味喎。
7:05 pm	食完飯就走番出外灘, 因為已經過左七點, 所以外灘一帶既建築群同對岸既東方明珠塔都著晒燈喇, 景色一絕！
8:00 pm	一路走到金陵路輪渡站, 搭船過對岸既陸家嘴。搭呢架船只需兩蚊, 用一卡通唔駛買票, 就好似係尖沙咀搭船過灣仔咁。
8:30 pm	到左陸家嘴就走到 "金茂大廈" 觀光塔, 上去要俾 100 蚊, 都幾貴喎。觀光塔係第 88 層, 第 53 至 87 層係金茂君悅大酒店。
9:15 pm	離開金茂大廈, 一路走到正大廣場。到左十點鐘正大廣場關門, 咁我地都走啦, 呢個時候發現東方明珠塔都熄晒燈, 我諗外灘同東方明珠塔每晚都只亮燈三個鐘俾人欣賞, 都算環保！
10:10 pm	走回陸家嘴地鐵站, 搭地鐵番上海火車站。
10:45 pm	第一日到步就行左成日, 好累......沖完涼就即刻休息了。