[2011 信州．紅葉] Day 2 橫谷峽賞紅葉 + 超正和牛

~Day 2~

16/10/2011 (Sunday) 晴

松本 --> 松本城 --> 橫谷峽 --> 松本站前 Toyoko-inn

8:30 am	wake up...今天正式向信州既紅葉進發！係酒店食個簡單早餐, 然後 check out。
9:50 am	由於今晚會入住松本既東橫 inn, 所以我地 check out 後就先到松本站前東橫 inn 放低行理。我地同個 staff 講今晚會番黎 check in 同需要泊車的, 佢話泊車位係先到先得。我記得長野果間係可以預約, 就同佢講我地之後有一晚會住長野東橫 inn, 請佢幫我地打電話過去約左先, 佢都好好人咁幫我地搞掂左。
10:15 am	出發往第一個景點 - 松本城。 松本城與姬路城、彥根城、太山城並列為日本四大國寶級城樓, 其中姬路城我地都去過了, 比松本城還要大還要宏偉。
12:15 pm	因為 d 樓梯好窄, 人又多, 排左半個鐘先上到去天守閣。
1:00 pm	離開松本城係時候食 lunch, 因時間不多, 只在附近選了一間試試信州既名物 Soba, 亦即蕎麥麵, 但味道普通。
1:45 pm	食飽飽就去 Toyota 租車, 我地已在網上 book 左, 黎到只辦理簡單手續就可以拎車喇。
2:15 pm	已經係下午二點鐘, 冬天既太陽伯伯都好早休息, 所以我地都好心急, 即刻開車到下一景點 - 橫谷峽。
3:15 pm	橫谷峽算是今趟紅葉之旅既起點, 其實係信州睇紅葉有好多出名既地方, 但大多交通不便, 所以我地選擇自駕遊, 可以走遍整個長野縣開滿紅葉既地方。
3:50 pm	黎到橫谷峽觀音展望台。
4:15 pm	再由展望台行去瀑布 "王潼"。
5:30 pm	成日黎日本既應該都知, 日本有好多大大小小不同既瀑布, 雖然係靚, 但如果時間不多, 就建議大家唔駛去呢個 "王潼", 因為由展望台行落去都幾遠, 睇完上番黎都已經接近天黑了。
5:45 pm	再渣車去蓼科湖, 但黎到個天已經黑晒喇 >.<
7:00 pm	夜晚想食信州和牛, 係日本既 openrice 度搵左一間人氣好高既, 但地點就唔太方便, 距離松本大概十公里左右啦, 咁我地又有車, 冇理由唔去喎, 一於去試下。大約七點鐘, 黎到呢個有點荒蕪既地方, 叫安曇野市, 見到呢間 "和牛廚 FUKA 尾", 心諗乜有人黎架咩？入到去, 入面又幾多人喎...... 坐低睇下個餐牌, 有 Shabu Shabu 同鐵板燒兩種食法, 但冇放題, 咁我地就問下佢可唔可以一個食 Shabu Shabu, 一個食鐵板燒, 佢走去問一問番黎話可以, 但食完之後我地係度諗, 係咪真係得既呢？佢要先 serve 我地食 Shabu Shabu, 然後先再食鐵板燒, 都幾麻煩喎......
	我地叫左兩個 Course, 有前菜, 馬肉刺身, 和牛同甜品, 食完之後真係要俾一百分佢, 好好味, 唔怪得係日本 openrice 居於首位！如果大家去松本自駕遊, 又好鍾意食和牛的話, 一定要去呢間試試, 超級推介！
9:05 pm	食左兩個鐘, 真係好味, 哈哈！渣車番松本, 半個鐘就番到去喇！
9:30 pm	回到松本東橫 inn check in, 再係東橫 inn 既停車場泊好架車, 盛惠 500 日元！
11:30 pm	睇下相, 上下網, 執下野又訓覺喇。