[2012 土耳其．世界遺產] Day 3 加歷奇．特洛伊古城、巴格門古城

~Day 3~

4/4/2012 (Wednesday) 晴

加歷奇 --> 特洛伊古城 --> 巴格門古城 --> 古薩達斯

6:45 am	在酒店舒舒服服地睡一覺, 今日終於成個醒晒！
7:30 am	到酒店餐廳食早餐, 食飽飽後就要出發了。
8:45 am	我地第一個景點係特洛伊古城, 即是木馬屠城記既起源地, 重點當然是那隻木馬。不過往特洛伊之前, 導遊帶左我地去加歷奇市, 睇左另一隻木馬。呢隻木馬正是由 Brad Pitt 主演既電影 Troy 入面果隻木馬黎, 拍完戲就放左係呢個 CITY 度喇...
9:35 am	到達世界文化遺產 "特洛伊古城" (Troy)... 其實特洛伊係一個希臘既神話, 若說 "木馬屠城記", 應該無人不曉啦？傳說希臘士兵躲進一隻巨型木馬入面, 特洛伊士兵開左特洛伊城既城門讓木馬進入, 咁希臘士兵就成功進城把所有特洛伊人殺死, 最後希臘人得到了勝利, 結束左維持了十年既戰爭。 今天既特洛伊古城風景美麗, 不過留下來既建築物已不多, 其實可以話冇咩野睇 >.< 我覺得這裡似遺跡多過古城啊！
10:45 am	離開特洛伊古城, 出發往巴格門古城, 車程需時三個多小時。 係呢度都分享一下土耳其旅遊既交通情況, 由於土耳其呢個國家十分大, 主要既景點都分得好散, 所以每天都要搭好多長途車, 三四個鐘係等閒事。不過大家唔駛俾佢既車程嚇怕左, 皆因車程中途必會有休息站, 讓你下車去一去洗手間同鬆鬆筋骨, 其實都不會太辛苦。
12:30 pm	車行左差不多兩個鐘, 就停左係一個休息站喇, 我地就可以去洗手間同買下手信咁。琴日係休息站飲左土耳其蘋果茶, 今次就飲土耳其咖啡啦。
2:00 pm	再搭多約一個鐘頭車, 約下午兩點, 終於都到左巴格門古城附近了, 我地先食 Lunch。
3:15 pm	食完午餐就出發往巴格門古城 (Pergamon), 巴格門曾經是古希臘最繁盛既古城之一。古城裏有神殿、寺廟等遺跡, 亦有美麗既風景。臨走時仲試左當地新鮮榨出來既石榴汁...
4:45 pm	遊覽完巴格門古城, 就向古薩達斯 (Kusadasi) 進發, 車程大約兩小時。
6:30 pm	到左位於土耳其西端既海邊渡假勝地古薩達斯, 呢度面臨愛琴海, 可以感受到土耳其休閒渡假風情, 仲可以係呢度坐船去希臘架。我地稍為休息一下, 再到酒店吃自助晚餐。
11:00 pm	洗澡睡覺了。