[2012 芬蘭．破冰船] Day 4 土庫、再向北極圈進發尋找北極光

~Day 4~

25/1/2012 (Wednesday) 少雪

土庫 --> 土庫城 (Turun linna) --> 土庫大教堂 (Tuomiokirkko) --> 赫爾辛基萬塔機場 --> 羅凡尼米 (Rovaniemi)

(以下轉芬蘭時間) 6:45 am	雖然瑞典同芬蘭只係隔左一個波羅的海, 但芬蘭係快瑞典一小時的, 係芬蘭時間朝早六點幾, 船上既工作人員已經黎開你門叫你起身喇...
8:00 am	黎到土庫都係七點半, 天都未光 >.< 我地拖住行理走到距離碼頭不遠既土庫城 (Turun linna)... 土庫城是芬蘭最大既古城 (睇落去好細咋喎...>.<), 建於 1280 年, 入面有個博物館, 展出各個時代既文物, 不過要十點鐘先開門 >.< >.< 我地沿住古城外圍走, 去到正門見可以入去, 咪影埋城堡入面個樣...
8:30 am	土庫城隔離就有個巴士站, 我地搭巴士去土庫市中心。係市集廣場附近落車, 再走到土庫大教堂 (Tuomiokirkko)。
9:00 am	土庫大教堂係位於歐拉河 (Aure) 左岸的一座巨大紅磚建築物, 被認為是芬蘭最重要的大教堂, 尖高帽子形的尖塔最引人注目。
10:15 am	影完大教堂就走回市集廣場 (Kauppatori), 亦都趁機欣賞下呢個曾經為芬蘭首都既城市。見到有個商場, 諗住入去搵洗手間, 又見到有間 cafe, 順便食埋個 Brunch...
11:00 am	走到土庫火車站, 我地會搭十一點開出既火車到赫爾辛基 (Helsinki)。第一次搭芬蘭火車, 感覺好先進, 火車有兩層, 座位都分好多種, 有普通座, 有 working compartment, 有張 table 俾你用電腦, 有 family compartment, 一家大細唔驚騷擾到人, 大家 book 火車時都可以要求某種座位既... 唔知係咪北歐治安真係咁好, 呢度搭火車係唔駛入閘既, 上左車之後會有人黎查飛, book 左飛既講個 booking number 俾佢聽都得架。
12:58 pm	由土庫去赫爾辛基都要兩個鐘, 到左中央車站 (Railway Station) 一定要參觀下先。1914 年完工既中央車站是由建築師 - 伊利爾沙里寧設計的, 車站入口處用花崗岩砌成直牆, 屋頂用銅屈成彎曲既形狀, 一直一曲, 兩邊對稱, 形成正門入口的拱形, 同時入口兩側, 有四個直立的巨型雕像捧著四個圓球, 意味是文明的傳遞者。這設計融合了理性與創意, 堪稱是現代建築的傑作。
1:45 pm	欣賞完個中央車站原本想把握時間再行下車站周邊既景點, 但此時下著毛毛雪, 地上積雪又難行, 所以決定早 d 搭車去機場。去機場可以搭 615 號 local bus 或者 Finnair 機場巴士, 後者當然係快 d 同貴 d 啦, 我地有時間所以去搭 local bus, 巴士站就在中央車站前。
2:30 pm	好快就辦理好 check in 手續, 去 Lounge 食野。
4:15 pm	我地會搭芬蘭航空 AY429 由赫爾辛基飛往芬蘭北部拉普蘭地區 (Lapland) 既羅凡尼米 (Rovaniemi), 此時宣佈正式向北極圈進發 yeah！ 機程好短, 只得個幾鐘, 但機上冇野食, 只得一杯野飲, 仲要限住飲咩... 個空姐話 finnair 既內陸機係咁, 我心諗, 內陸機唔駛錢咩, 香港搭去台灣都有野食啦, 好彩岩岩係 lounge 食左 >.<
5:35 pm	羅凡尼米機場係一個非常細既機場, 就連行理輸送帶都只有一條, 不過呢度雖然細, 但就佈置得好靚, 好有聖誕氣氛, 真不愧為聖誕老人既故鄉, 呵呵！
6:10 pm	呢度人口密度低, 飛機班次又唔多, 所以呢度係冇 public transportation 既。為左方便旅客, 機場除左有租車公司之外, 每逢有飛機到達就會有 d 黃色既 Airport Taxi 係度等人, 坐滿先開, 你話俾佢聽你要去邊佢就會車你去, 每人 7 EUR。
7:00 pm	到左預先 book 左既小木屋 B&B Kotitie, 一落車已經見到小木屋主人出黎迎接我地喇。嘩, 呢間小木屋好靚呀, 以 80 EUR 一晚既價錢黎計, 真係超值。小木屋主人就住係對面, 有咩事都可以過去搵佢既。 沖完涼就煮野食喇, 我今晚煮左白汁長通粉... 食完就等北極光, 但影出黎好暗 >.< ...
12:00 am	都係訓覺先...