[2011 北海道．雪祭] Day 4 蒸汽火車 SL 冬之濕原號、摩周、川湯

~Day 4~

4/2/2011 (Friday) 晴

阿寒湖 --> 釧路 --> SL 冬之濕原號 --> 標茶 --> 屈斜路湖 --> 摩周湖 --> 川湯溫泉 --> 摩周湖星紀行 --> 川湯名湯之森溫泉酒店

6:15 am	一早起床, 因為想浸多次溫泉啊...到左朝早, 男女既大浴場已經調轉左喇...夜晚浸一次, 朝早浸一次, 就兩個溫泉都浸晒喇...
7:00 am	於酒店食自助早餐。
8:10 am	為左乘搭 11:09am 於釧路開出既蒸氣火車 "SL 冬之濕原號", 我地一早就要搭阿寒巴士返回釧路喇。鶴雅原本係有免費 shuttle bus 的, 但時間太晏了, 趕不及搭 SL冬之濕原號, 所以要忍痛自費搭巴士。 9:05am 巴士駛到一個道之站, 我地可以落車休息去下洗手間咁...行遠少少仲有一個丹頂之里, 入面都有丹頂鶴, 不過就要買飛先可以入去睇, 係出面係睇唔倒既...如果自駕既朋友都可以順道欣賞下丹頂鶴呢！ 10:40am 到達釧路。
11:09 am	返回釧路站就去搭 SL 冬之濕原號喇。 SL 即是蒸氣火車, 由釧路行駛至標茶。整列火車共四個車廂, 由蒸氣火車頭驅動, 行走時火車頭會噴出濃濃黑煙, 嗚嗚聲響個不停, 空氣裏充斥著煤炭味道, 雖不甚環保, 但懷舊十足。SL 冬之濕原號的車廂以釧路濕原的代表 --- 日本國鳥丹頂鶴作裝飾, 此外還有特別的紀念印章可蓋印留念, 乘客還可以穿上免費制服扮車長拍照！由標茶至釧路的車程大約個多小時, 車廂最特別是設有炭爐, 售賣乾魷魚、香腸等給乘客燒烤, 炭爐又兼保曖功能, 大家一齊烘烘手、談談笑, 十分寫意。 火車開動之前, 乘客都爭相到車頭拍照, 直至聽到火車響起嗚嗚聲, 大家都乖乖上車了。
12:24 pm	SL 冬之濕原號列車到達標茶站, 不幸的事發生了。我地原本計劃下車後立刻轉乘 12:28pm 於標茶開出的列車往川湯溫泉站, 再轉 1:55pm 既屈斜路巴士去屈斜路湖。怎料火車時間表作出了改動, 列車要 1:10pm 才會到達標茶, 於 1:50pm 才到川湯溫泉站。一睇到個新既時間表, 心諗, 咁大鑊, 得五分鐘仲要拖住個點夠時間轉巴士呢？不過擔心都冇用, 時間表已經改左, 咁我地唯有希望趕得切轉屈斜路巴士啦。 既然火車未到, 就周圍影下相。
1:10 pm	前往川湯溫泉既列車到達標茶站, 我地好擔心架火車唔準時遲左到川湯溫泉站呀。係火車上, 我地諗好計仔, 當火車一到站, 阿明就負責拖住兩個?, 我就跑出去搵巴士, 然後請巴士司機等埋我地先好開車, 哈哈！
1:55 pm	到達川湯溫泉, 我地依計行事, 我先下車去找巴士。很幸運地, 因川湯溫泉站是一個很細小的車站, 一落火車就出閘, 又唔駛落樓梯, 所以我好快就走左出火車站, 仲見到我地要搭果架屈斜路巴士停左係站外面 tim... 我即刻走過去, 問司機叔叔是否到屈斜路湖同硫磺山, 佢話係, 仲幫我地拎埋行李上車 tim...成功左, 真係抹一把汗呢！
2:00 pm	呢架屈斜路巴士由川湯溫泉站開出, 會途經硫磺山, 再到屈斜路湖, 每個景點會停留十五分鐘, 最後再返回川湯溫泉站, 可說是一架觀光巴士來。 我地首先到左硫磺山, 然後再到屈斜路湖睇砂湯同天鵝浴。
3:15 pm	離開屈斜路湖, 架車繼續行駛, 我地到左摩周站就落車, 轉乘摩周湖巴士上摩周湖第一展望台。摩周站係一個好細既 JR 站, 可能就係因為細, 冇 locker, 亦因為呢度係遊客區, 呢個站居然幫人 keep 行理, 咁我地就放低左兩件大型行李喇。
3:35 pm	摩周湖巴士開出, 3:55 pm 準時到達摩周湖第一展望台。好難得咁睇到摩周湖既面貌, 因為摩周湖很多時都被大霧籠罩, 只見霧不見湖。 遊覽過阿寒湖、屈斜路湖同摩周湖, 就即係去過道東三湖喇, yeah!
4:35 pm	搭摩周湖巴士返回摩周站, 於站內取回寄存行理就等火車回川湯溫泉。
5:22 pm	我地係香港 book 川湯溫泉酒店時, 已 send email 希望佢地渣車出來接我地, 果然我地一落車, 就見到酒店架車停左係度喇, 真係要讚...不過...太早讚係唔得既, 因為...睇埋聽日先講... 酒店離火車站唔算太遠, 車程都只係五至十分鐘左右。
6:00 pm	check in 後稍為休息一下就食 dinner。
7:30 pm	川湯溫泉相對阿寒湖、層雲峽呢 d 溫泉區, 比較少人來...好多人都係遊完摩周湖就離開向網走進發。我地選擇係呢度留一晚, 係因為我地要去摩周湖觀星。我地一早已 book 左個 tour "摩周湖星紀行", 夜晚由川湯溫泉出發再到摩周湖睇星星！ 夜晚既摩周湖真係超多星星, 唔怪得呢度有睇星團啦...真係睇到我眼都唔眨...我地仲嘗試影星軌, 但係時間實在太少喇, 得半個鐘...最後都叫做有一張可以睇得下既作品掛, 失禮失禮！
9:10 pm	返回酒店, 又去浸溫泉喇...
11:30 pm	明天又要早起, 所以早點睡覺。