[2010 埃及、約旦] Day 7 阿布辛貝神廟

~Day 7~

30/7/2010 (Friday) 晴

阿斯旺 --> 阿布辛貝神廟 (自費活動) --> 亞斯旺市集 --> 火車 (往開羅)

3:30 am	無睇錯, 係 3:30 am morning call, 因為 4:30 am 要準時出發往阿布辛貝神廟。
4:30 am	遊船都係安排早餐餐盒, 等我地上左車先食早餐, 不過我一上車, 第一時間係訓覺, 因為車程要三至四個鐘, 正好彌補睡眠既不足。差不多七點鐘, 訓醒左先食個餐盒, 食完就差不多到了。
8:00 am	阿布辛貝神廟 (Temple of Abu Simbel), 又稱為 Temple of Ramesses II, 顧名思義, 為拉美西斯二世所建。神廟依山崖而建, 古時面向尼羅河, 對著南方的盧比亞 (Nubia), 用以炫耀拉美西斯二世的偉大。進入神廟後是一個柱廊大廳, 四周刻滿壁畫, 描述拉美西斯二世的戰績。 現今的神廟已不是面對著尼羅河, 而是因亞斯旺水壩的興建、蓄水而成的納瑟湖 (Lake Nasser)。當年興建水霸時, 為免神廟被水淹沒而把神廟切開後, 再在高位依原貌重建。神廟已經夠大, 起都唔容易, 仲話要將佢切開幾百份再砌番埋, 真係勁！
10:00 am	逗留兩個鐘, 又要回程了。參觀阿布辛貝神廟係一個自費活動黎, 仲要唔平, 成百幾蚊美金架, 朝早四點幾起身, 搭成三個半鐘頭車, 即來回都已經七個鐘, 去到只係逗留兩個鐘, 值唔值得去, 就見仁見智了。 回程時, 因為天氣太熱, 途中見到海市蜃樓...
1:30 pm	返回遊船, 食午餐, 呢餐係船上既最後一餐了, 食完野我地就要執行理離開住了三晚的遊船。
2:00 pm	我地今晚會搭七點鐘火車, 由亞斯旺回開羅, 咁晏晝呢幾個鐘做咩呢, 旅行社就安排左一間好普通既酒店俾我地, 可以休息一下同埋沖涼, 因為今晚上左火車就冇得沖涼架喇...領隊分好房間, 說六點鐘集合。
3:00 pm	我地見有咁多個鐘, 又唔想訓覺, 於是又出去火車站附近既市集逛逛, 不過呢個時候天氣真係好熱, d 太陽曬落 d 皮膚度都有少少"辣"肉... 我地經過一個賣沙樽既檔, 那個賣沙樽的人係咁同我地講國語"你好, 你好", 佢仲貼左張用中文寫既宣傳單張, 叫人幫襯佢, 後來有 d 日本人黎到, 佢又識講幾句日文喎, 仲逗得 d 日本妹妹仔好鬼開心 tim, 勁...！
4:30 pm	番酒店沖涼, 呢間酒店真係好鬼簡陋, 開頭個花灑冇乜水出, 好似塞住左咁, 後來要叫人來換... 通常住呢 d 地方既都係 d 周圍去既自由行, 以鬼佬為主...
6:00 pm	集合了, 領隊帶我們走到火車站, 我地同團友係火車站附近既市集, 買左 pizza 同燒雞上火車食...之前上網見倒很多人都話火車上的食物好難食, 所以都會到市集買燒雞...於是乎我地又去買囉...食完之後, 發覺又唔係話真係咁好食, 而且冇食到火車上面果個晚餐, 我仲覺得有 d 浪費 tim...
7:00 pm	火車從亞斯旺出發了, 開車後, 我地同團友就開餐, 然後悶悶地就玩 bridge... 唔記得左幾點鐘, 我地仲係度玩緊 bridge, 玩到興高采烈之際, 架火車突然漆黑一片, d 燈熄晒...應該係有人用電用得勁得濟, 跳左掣 >.< 初時我地都繼續玩, 後來因為冇左冷氣開始焗了, 我地都企晒係走廊度傾計算...
10:00 pm	等左好耐, 架火車都仲係冇電... 架火車已經又舊又落後架啦, 估唔到 d 人整咁耐都係搞唔掂, 好辛苦... 架火車到左樂蜀喇, 因為係大站, 所以架火車會係呢度停留一陣, 我忍唔住落左火車去買汽水飲... 又唔記得大約幾點, 架火車終於有番電, 當火車著番燈之際, d 人都開心到歡呼起來, 冷氣亦有番...
11:30 pm	我地都梳洗, 準備休息了。