[2007 首爾．滑雪] Day 1 首爾

~Day 1~

22/12/2007 (Saturday) 晴

香港 --> 首爾仁川機場 --> 新村女子大學街 --> 仁寺洞 --> 東大門 --> 酒店

10:00 pm (21/12/2007)	呢個韓國五天滑雪豪華團於 22/12/2007 (星期六) 展開, 但我地坐既係零晨機, 所以係星期五晚已經要出發到機場集合了。星期五都仲要番工架, 放工就要準備出發, 原本就好鬼興奮, 後來就知味道了。到左機場後, 到領隊處報到, 然後自已入閘等上機。領隊係一個比較成熟既女人, 後來同佢傾計知道, 佢平時好少帶團 (應該做左管理層吧), 今次可能係聖誕太多團, 所以要出動幫手。
2:30 am (22/12/2007)	我地乘搭韓亞航空 OZ 724 航班到首爾既仁川機場, 班機 delay 左, 最後於零晨二點半左右起飛。訓左一陣, 又俾人叫醒食飛機餐, 食完再訓, 訓得唔係咁好, 慘......
(以下轉韓國時間) 6:30 am	韓國時間朝早六點半到達仁川機場, 此時係最熟睡既時候, 真係唔想落機......落機後取行理, 出境都好順利, 好快我地就見到個導遊, 佢叫 Jimmy, 係香港人來的, 娶左個韓國老婆, 住係韓國。因為旅遊車未到, 我地走左去麥當勞食早餐, 然後去換韓幣。
8:15 am	大約朝早八點三, 我地乘旅遊車向首爾進發, 今次真係抵到爛, 玩足五天, 絕無花假, 不過我想講, 而家先係第一日既開始, 但我隻眼已經睜唔開。一上車, 導遊先介紹佢自已, 同行既仲有一個負責影相既攝影師, 佢叫 Andy, 好得意架。所有韓國團都會有攝影師, 食飯時又會 serve 你, Jimmy 話係國家俾果 d 當完兵既後生仔做, 驚佢地冇野做喎。仲有個司機, 後生時都係當兵架喎, 唔知真定假。
9:30 am	我地到左首爾既第一個目的地就係 7 Luck 賭場, 入去唔係為賭錢, 而係去漱口洗面, 兼飲免費汽水, 哈哈。
10:50 am	離開賭場, 我地就坐旅遊車去左新村女子大學街。我諗呢個名係香港 d 旅行社自已改的, 新村女子大學街位於新村區, 新村地區有韓國四大名校，即延世大學、梨花女子大學、西江大學及弘益大學。此地區極為繁華，各種大小商店密集。此外，這裡還有各種服飾及鞋帽專賣店，並且還有各種韓式、日式及西餐廳，以及麥當勞、必勝客、肯德基等速食連鎖店。再者, 沿著新村名品大街向梨花女大方向前進，在街道的兩旁，有各種美容美髮店、化妝品店、首飾店以及算命咖啡館等等。
12:20 pm	跟旅行團有樣好, 就係唔駛練仙。我地跟住導遊去開飯喇, 呢餐食石頭窩飯, 麻麻地好食。
1:50 pm	食飽飽後去仁寺洞, 它是一條購物大街, 售賣古代美術品、韓服、各種工藝品......我地當然係空手而回啦......
3:35 pm	逛完仁寺洞去東大門, 呢個名香港人應該聽得多, 呢度有 d 似香港既旺角中心。Jimmy 叫我地唔好買野, 佢話呢度賣既都係假野。其實佢唔叫我地都唔會買野啦, 我地行左一陣直頭走左出去影相 tim......
4:45 pm	行完東大門, 番上旅遊車, 唔知係咪各團友都好累咁款, Jimmy 提議今晚唔好食晚餐, 早 d 訓, 各人都舉腳贊成......
6:30 pm	番酒店 check in, 呢間係一間韓國既五星級酒店, 好靚......我地放低行理後, 到附近便利店買杯麵番酒店食, 食完就休息了。搭零晨機的確係玩足五天, 不過第一天都幾辛苦, 唔一定係好。